Flogfelagið SAS fer veruliga inn í ein nýggjan veruleika í hesum døgum.
Mikudagin steig felagið úr konkursverjuni, sum hevur hildið felagnum undan hóttan um at fara av knóranum, meðan ein umlegging varð sett saman.
Og hósdagin tekur felagið seg úr Star Alliance samstarvinum og fer í eitt nýtt, nevniliga Skyteam.
Hetta merkir farvæl til undanfarnu 25 samstarvsfelagar, sum fevna um Lufthansa, United Airlines og Thai Airways.
Nú skal felagið samstarva við 19 aðrar fyritøkur - millum annað Air France-KLM, Delta og Virgin - hvørs net SAS kundar kunnu brúka í framtíðini.
- Tað eru helst mest ferðafólkini, sum flúgva nógv við SAS, sum fara at merkja munin.
- Og hetta gera tey helst av, at tað framyvir verður eitt annað navn á halaróðrinum á flogførunum, sum tey ferðast við seinasta partin av ferðini, sigur Jacob Pedersen, sum er floggreinari í Sydbanken.
Hann sær ikki stóran mun á teimum báðum samgongunum, hvørs netverk bæði fevna um fleiri enn 1.000 ferðamál um allan heimin.
- Tað verða kanska nøkur ferðamál, sum donsk ferðandi ikki longur hava atgongd til, men umvent kann tað lata upp fyri nýggjum sambondum.
- Men harumframt fer SAS helst at gera alt fyri, at viðskiftafólk ikki fáa neiligar avleiðingar av broytingini, sigur Jacob Pedersen.
Við skiftinum til Skyteam kemur SAS sjálvsagt nærri Air France-KLM, sum eftir umleggingina er vorðin medeigari.
Men tað kunnu eisini vera aðrir positivir síðuvinningar av at byrja í eini nýggjari samgongu, heldur Jacob Pedersen.
- Eitt punkt var helst komið á mál í Star Alliance har metalmøði hevði sett seg í transatlantiska samstarvið.
- Nú byrjar tú við einum blankum pappíri, og alt er opið og møguligt. Hjá SAS snýr tað seg um at fáa tað besta burturúr ferðafólkastreyminum inn og úr Skandinavia, sigur greinarin.
/ritzau/
