Eitt ísfiskalínuskip er nýliga byrjað túr á Íslandsrygginum, og tvey smærri ísfiskalínuskip eru á landgrunninum.
- Tey smærru skipini koma inn at landa í vikuni, men ivasamt er um skipið, sum er á Íslandsrygginum, landar hesa vikuna.
Tað vita tey á Fiskamarknaði Føroya at siga.
Tvey frystilínuskip eru á Føroyabanka, eitt er í íslendskum sjógvi, eitt er á Íslandsrygginum, og eitt er á landgrunninum.
- Línuskipini fáa eina blanding av toski, hýsu, longu og brosmu.
Um útróður verður sagt, at streymurin er góður, men harðnar, sum vikan gongur.
- Veðrið verður gott, og tí rokna vit við nógvum útróðri, serliga fyrst í vikuni, meðan streymurin er góður.
Á Fiskamarknaði Føroya vænta tey, at onkur útróðrarbátur eisini fer út á Føroyabanka.
- Fiskiskapurin er smáligur á landgrunninum, men góður á Føroyabanka, har bátarnir fáa mest av toski og hýsu, verður lagt aftrat.
