Ukrainskar dronur hava rakt mál langt inni í Russlandi í nátt í Saratov-landslutinum.
Ein oljugoymsla, sum Engels Air Base brúkar, er rakt.
Tað upplýsir ukrainski forsetaráðgevin, Oleksandr Kamyshin, á sosiala miðlinum X.
Engels Air Base verður brúkt av russisku flogverjuni og hýsir langtrøkkandi bumbuflogførum, sum eru partur av kjarnorkuherunum í landinum.
- Álopið á oljugoymsluna skapar álvarsligar logistiskar trupulleikar fyri strategisku flogferðsluna hjá russisku hersetingarvaldinum og minkar munandi um møguleika teirra at raka friðarligar ukrainskar býir og sivil mark, skrivar ukrainski herurin á Telegram, sambært Reuters.
Stórur eldur er í býnum Engels, upplýstu myndugleikarnir á staðnum fyrr mikudagin, sambært Reuters.
Tað er ikki greitt, um eldurin er í oljugoymsluni. Men tað sigst at elva til órógv á ídnaðarøki.
Engels Air Base liggur nærhendis býnum Saratov, umleið 730 kilometrar í ein landsynning úr russiska høvuðsstaðnum, Moskva. Tað er fleiri hundrað kilometrar frá markinum til Ukraina.
Í desember 2022 doyðu trý fólk í russiska herinum júst á hesi russisku flogstøð av vraklutum frá eini ukrainskari dronu.
Álopið í dag fer fram, meðan Ukraina er undir trýsti.
##med2##
Seint í 2024 fór Russland fram í eystara parti av Ukraina við einum ferð, sum ikki hevur verið sædd síðani kríggið byrjaði í 2022. Russland stýrir nú umleið einum fimtaparti av økinum hjá Ukraina, skrivar Reuters.
Samstundis hevur Ukraina hertikið eitt lítið øki í Kursk-landslutinum í Russlandi, har bardagarnir halda fram. Innrásin hjá ukrainska herinum til Russlands verður hildin at hava til endamáls millum annað at geva Ukraina betri samráðingarumstøður í framtíðini.
Báðir partar royna at stamda seg sum best á vígvøllinum, áðrenn Donald Trump kemur aftur í Hvítu Húsini seinni í hesum mánaðinum.
/Ritzau/
