Í sínari regluligu kvøldartalu, sum Volodymyr Zelenskyj legði út á sosiala miðilin, Telegram, í gjárkvøldið, segði forsetin, at innrásin í russiska Kursk-landslutinum gongur sum ætlað.
- Ukraina røkkur sínum strategisku málum við átakinum, segði hann.
Zelenskyj heitti eisini á sameindu hjá Ukraina um at loyva ukrainska herinum at fremja álop á mál í Russlandi við langtberandi vápnum, sum landið hevur.
- Tess skjótari ein slík avgerð fyriliggur hjá okkara sameindu, jú minni kann russiski forsetin, Vladimir Putin, gera, segði hann.
Fyrr í gjár segði forsetin eisini, at ukrainski herurin heldur seg neyvt til fólkarættin og altjóða avtalur, nú ukrainskar herdeildir taka seg fram í russiska Kursk-landslutinum.
Sambært ukrainskum myndugleikum eru ongar ætlanir um at halda fast um russiskt landaøki, og ukrainski herurin fer heldur ikki at skaða russiska fólkið í økinum, sum ukrainar nú hava ræðið á.
Varaforsætisráðharrin í Ukraina, Iryna Veresjtsjuk, sigur, at tey fara at veita sivilfólkinum í Kursk humanitera hjálp.
Hon vísir á, at ætlanin er eisini at skipa soleiðis fyri, at sivilfólk í hersettu økjunum fáa møguleikan at fara til onnur støð í Russlandi ella Ukraina, meðan bardagar eru.
Á Telegram skrivar Iryna Veresjtsjuk, at Ukraina sær fyri sær ein trygdargeira, haðani hjálp kann veitast fólkinum, sum eru rakt av krígnum hjá russiska forsetanum.
- Altjóða hjálparfelagsskapir sum eitt nú ST og Reyði Krossur fara eisini at sleppa inn í Kursk-økið, sum Ukraina hevur hersett, leggur hon aftrat.
Í gjár leiddi forsetin, Volodymyr Zelenskyj, ein fund um trygdar-og humaniteru støðuna í Kursk, og her nevndi hann eisini møguleikan at skipa eina hernaðarumsiting í økinum.
At Ukraina vil virða mannarættindini, hevur eisini nakað við ræðuleikarnar at gera, sum russisku hermenninir framdu, tá teir royndu at taka ukrainska høvuðsstaðin Kyiv á vári í 2022.
- Tá varð eitt stórt tal av sivilfólki pínt og dripið, og serliga minnast vit ræðuleikarnar í forstaðnum til Kyiv, Butsja, eftir at russisku herdeildirnar noyddust at taka seg úr økinum.
Dagbladet.no, sum er kelda til hesa greinina, veit at siga, at nógvar frásagnir eisini eru komnar um fongslingar, píningar og um sivilfólk, sum eru horvin í Donbas-økinum í Ukraina, sum russar hava ræðið á.
Á myndini oman fyri verða fangar í russiskum hermannabúna fluttir í ukrainskum hernaðarakfari. Ætlanin er, veit www.dagbladet.no at siga, at fangarnir seinni skulu latast leysir aftur í býti við ukrainskar fangar.
