Eitt F-16 flogfar er skotið niður í Ukraina og flogskiparin, 26 ára gamli Pavlo Ivanov, er deyður.
Tað skrivar forsetin í Ukraina, Volodymyr Zelenskyj, í einum uppslagi á X.
Hann leggur eisini dent á, at støðan enn er kannað.
– Vit eru við at staðfesta allar umstøðurnar, skrivar Zelensky.
Flogførini, sum eru framleidd í USA, vóru latin av m. a. Danmark og Hollandi, og fyrstu avhendingarnar byrjaðu á sumri í fjør.
Sambært Ukraina datt fyrsta F-16 flogfarið niður í august 2024 undir einum russiskum rakettálop. Flogskiparin doyði eisini tá, skrivar AFP.
Hetta ger hendingina leygardagin til aðru ferð, at eitt F-16 flogfar verður skotið niður í Ukraina eftir útlendsku avhendingarnar av flogførum.
Danmark hevur lovað at lata 19 amerikansk jagaraflogfør, sum eru stigvíst avtikin í donsku verjuni, meðan Holland hevur lovað 24.
Síðani Russland gjørdi innrás í Ukraina 24. februar 2022, hevur Danmark stuðlað Ukraina hernaðarliga fyri umleið 55,5 milliardir krónur.
Hetta hevur fevnt um F-16 jagaraflogfør (tey eru ikki øll avhendað enn), ymisk sløg av strand- og loftverjurakettum, og nærum 180 stríðsvognar.
Umframt hernaðarligan stuðul hevur Danmark eisini sent umleið 5,8 milliardir krónur til Ukraina í sivilum stuðli. Tað fevnir um pening til umbygging og menniskjahjálp.
Í desember í fjør staðfesti ukrainski forsetin, at "seinna umfarið" av F-16 flogførum var sent úr Danmark til Ukraina.
- Hetta er eitt dømi um leiðslu í at verja lívið, sum skilur Danmark (frá øðrum londum, red.), skrivaði Zelenskyj og legði afturat:
- Vóru allir okkara samstarvsfelagar so miðvísir, so var russiski terrorurin longu gjørdur ógjørligur.
Júst hvussu nógv F-16 jagaraflogfør Danmark hevur latið til Ukraina av teimum 19 lovaðu, er ikki greitt.
/Ritzau/
