BORG fer at byggja stóran bygning á nýggju útfyllingini innanfyri Bakkafrost. Her er ætlanin at savna alt virksemið hjá BORG í Eysturoy, veit Runavíkar kommuna at siga í kvøld:
Eftir drúgvar fyrireikingar og tingingar skrivaðu borgarstjórin og stjórin í felagnum Borg, Tórbjørn Jacobsen og Rodmundur Nielsen, í dag undir avtalu í sambandi við, at felagið, sum fæst við at selja timbur o.a., ætlar at byggja ein nýggjan timburhandil innast á útfyllingini niðanfyri Heimistovubøin á Glyvrum. Býráðið hevur tikið undir við avtaluni, sum hon fyriliggur.
Tað snýr eg um eina fyribilsavtalu, ið verður nýtt sum útgangsstøði undir einum leigusáttmáa, sum partarnir ætla at gera sínámillum. Hendan avtalan er at meta sum eitt fyribils rættindaskjal, hagartil økið er endaliga matrikkulerað. Økið til bygningar er ásett til 11.156,5 fermetrar, leiguøkið kring um tað ábygda er 4.642,1 fermetrar og 3.255,8 fermetrar fara til kommunala parkering.
Umframt aðrar treytir er ásett í sáttmálanum, at hann er galdandi í tvey ár frá í dag at rokna.
Tað liggur í kortunum, at Pf. Borg ætlar at skipa alt sítt virksemi í Eysturoy í hesum økinum, og sambært stjóranum verður farið í gongd alt fyri eitt at fáa verkætlanina í lag og upp at standa. Pf. Borg hevur deildir í Klaksvík og í Tórshavn, og nú var ognin í Rókini vorðin ov lítil til økta virksemi felagsins.
