Yvirlýsing frá Heilsuhjálparafelag Føroya:
Aðalfundurin samtykti somuleiðis, at felagið kann fara í arbeiðssteðg, um samráðingarnar ikki bera á mál.
Aðalfundurin var merktur av støðuni í sáttmálasamráðingunum, har felagið komandi týsdag fer undir nýggja semingsroynd á Hotel Føroyum.
Forkvinnan greiddi limunum sum vóru møttir á fundinum, um samráðingarnar og gongdina higartil. M.a. greiddi hon frá stóru avbjóðingunum við, at Kommunala Arbeiðsgevarafelagið krevur skerjing í verkfalsrættinum, í býti fyri at felagið fær ta endurgjald fyri óvanligu høgu inflasjónina, ið onnur feløg fingu endurgjald fyri í 2022. Her var breið semja um, at verkfalsrætturin ikki skal avreiðast.
Sambært grein 10, stk. 3 í viðtøkum felagsins, skal limafundur til, fyri at felagið kann lýsa arbeiðssteðg. Tí legði nevndin fram uppskot um, at nevndin fær heimild at lýsa arbeiðssteðg, um samráðingarnar ikki bera á mál.
Tað er tí við stórari undirtøku frá limunum, at Heilsuhjálparafelag Føroya fer aftur til samráðingarborðið týsdagin.
Heilsuhjálparafelag Føroya
