Fyrr í dag upplýsti USA, at Russland og Ukraina vóru samd um at steðga við sínum álopum í Svartahavinum.
Fráboðanin kom úr Hvítu Húsunum, og sagt varð, at londini vóru samd um at tryggja skipaferðsluna á leiðini.
Seinni í dag visti Kreml at siga, at avtalan er treytað av, at revsitiltøk vestaneftir móti russiskum mati og handistøðum verða sett úr gildi.
Men, hesar útsagnir úr Kreml fullu ikki í góða jørð hjá ukrainska forsetanum, Volodymyr Zelenskyj.
Í sínari dagligu video-røðu til ukrainska fólkið í kvøld leggur hann Kreml undir at lúgva.
- Kreml lýgur, tá sagt verður, at vápnahvíldaravtalan um Svartahavið er treytað av, at revsititøk verða tikin burtur.
Og forsetin legði aftrat:
- Tíverri - og sjálvt í dag á degnum fyri samráðingunum - síggja vit, hvussu Russland longu manipulerar.
Ukrainski forsetin sigur, at Ukraina fer at gera alt, sum landið megnar, fyri at fáa avtaluna um Svartahavið at virka.
- Russland eigur at skilja, at um landið leypir á, verður harðliga svarað aftur, segði Volodymyr Zelenskyj í video-røðu síni í kvøld.
Amerikanski forsetin hevur eisini gjørt viðmerkingar til samráðingarnar í kvøld, og hann sigur, at góð gongd hevur verið í.
Donald Trump sigur eisini, at USA fer at hyggja nærri eftir russiska kravinum um at linka um revsititøkini móti landinum.
