Tað var Helgi Arbrahamsen, løgtingsmaður fyri Sambandsflokkin, sum setti landsstýrismanninum kommunumálum ein grein 52a fyrispurning um kommunuvalið.
Ítøkiliga spurdi hann soleiðis:
1. Hvat er endamálið við at hava mark fyri, hvussu nógv valevni kunnu standa á sama lista til kommunuval?
2. Ætlar landsstýrismaðurin at arbeiða fyri at broyta hetta?
3. Hvussu heldur landsstýrismaðurin, at kommunuvalið í 2024 gekk í síni heild?
Til fyrru spurningarnar sigur landsstýrismaðurin, at endamálið er helst at tryggja fólkaræðisligan dynamikk við at eggja til fleiri listar, men í viðmerkingunum til kommunuvallógina verður ásetingin ikki neyvari viðgjørd.
– Atlitini hjá spyrjaranum eru viðkomandi at taka við í viðgerðina, um farið verður undir at eftirhyggja kommunuvallógina við tí fyri eyga at gera broytingar. Eingin ætlan er um hetta í løtuni, sigur hann.
Til síðsta spurningin - um hvussu landsstýrismaðurin heldur, at kommunuvalið í 2024 gekk í síni heild, svara landsstýrismaðurin soleiðis:
– Løgmálaráðið metir, at kommunuvalið 12. novembur 2024 sum heild gekk væl. Øll bý- og bygdaráð vórðu mannað. Løgmálaráðið gjørdi eina kommunu varuga við, at valið ikki varð farið rætt fram sambært kommunuvallógini, og løgreglan viðger eitt mál um møguligt valsvik, sigur landsstýrismaðurin í kommunumálum, Bjarni K. Petersen.
