Franski forsetin, Emmanuel Macron, hevur tosað við amerikanska starvsbróðurin, Donald Trump, undan einum óformligum fundi um Ukraina, sum byrjaði í París seinnapartin í dag.
Tað siga starvsfólk hjá Macron frá, sambært tíðindastovunum AFP og Reuters.
Ongar smálutir vóru tøkir beinanvegin um, hvat teir báðir forsetarnir umrøddu.
Á fundinum fara evropeisku leiðararnir at umrøða trygdina í Evropa og hvussu Evropa skal svara uppá samráðingarnar hjá USA við Russland um frið í Ukraina.
Høgir amerikanskir sendimenn eru í Saudi Arabia, har teir væntandi hitta russisk umboð í morgin.
Mánadagin fara evropeiskir leiðarar væntandi eisini at umrøða seinastu fráboðanirnar úr USA um, at Evropa nú skal taka størri ábyrgd av trygdini á meginlandinum.
Hetta er eisini galdandi fyri trygdina hjá Ukraina og avbyrgingina av Russlandi.
Á fundinum í París luttaka forsetin í ES-nevndini, Ursula von der Leyen, og forsetin í ES, António Costa.
Somuleiðis aðalskrivarin í NATO, Mark Rutte, og ríkis- og stjórnarleiðarar úr Fraklandi, Týsklandi, Bretlandi, Italia, Póllandi, Spania, Hollandi og Danmark.
Danska forsætisráðfrúan, Mette Frederiksen, umboðar ikki bara Danmark, men eisini norðurlond og baltisku londini.
/Ritzau/
