Í døgunum, 13.-15. januar, skulu Lars-Emil Johansen og Lars Martin Møller-Sørensen, møta í Sermersooq Kredsret í Nuuk í Grønlandi, ákærdir fyri svik.
Lars-Emil Johansen er fyrrverandi tungvektari í grønlendskum politikki, eitt nú sum landsstýrisformaður, formaður í Siumut og fólkatingslimur.
Nú er hann skuldsettur fyri svik.
Ein annar, sum eisini er ákærdur og skal møta í rættinum í Nuuk fyri svik, er fyrrverandi kommunustjórin í Kommuneqarfik Sermersooq, Lars Martin Møller-Sørensen.
Sermitsiaq veit at siga, at sambært ákæruritinum hevur Lars-Emil Johansen fingið útgoldið 730.000 krónur sum ráðgevi í Kommuneqarfik Sermersooq - uttan at hava gjørt nakað fyri kommununa.
Soleiðis, sum skilst á Sermitsiaq, eru teir báðir, Lars-Emil Johansen og Lars Martin Møller-Sørensen, ákærdir í sama máli - annar sum ráðgevi og hin sum kommunustjóri.
