Tað sigur Aksel V. Johannesen, løgmaður, millum annað í samrøðu við Sosialin.
– Tað veit eg ikki!
Tað er stuta svarið frá løgmanni, tá vit spyrja, um fiskveiðusáttmálin við Russlandi verður longdur fyri eisini at galda fyri 2026.
Hann greiðir frá, at á heystið í 2023 kundu hann staðfesta, at tað bara var ein flokkur, sum stóð saman um at uppsiga fiskiveiðusamstarvið við Russland, soleiðis sum flokkarnir høvdu lovað undan valinum.
– Og so vóru nógvir einstaklingar í Tjóðveldi og onkur í Framsókn og Jenis av Rana sum vildu uppsiga sáttmálan, men vit taldu ikki ein meiriluta í Løgtinginum. Og heldur ikki í samgonguni, sigur løgmaður.
– Tann støðan er mær vitandi óbroytt. Men vit fara at taka tað upp til nýggja viðgerð eftir ólavsøku. Men tað sum hevur hast nú er, at ES hevur bannað ávísum skipum í sínum øki. Vit hava higartil fylgt pakkunum hjá ES, men í hesum før snýr pakkin seg ikki beinleiðis um kríggið í Ukraina, men meira um virksemið, sum Russland hevur aðrastaðni og at sanktionera russisk reiðarí, sum ES heldur eru við til at fremja hernaðarligt virksemi fyri russisku stjórina.
– Vit hava hugt eftir, hvat vit skulu gera, og hvat Noreg ger.
Uttanríkisráðið hevur staðfest, at tað er ikki lógarheimld at seta tað í verk í Føroyum, tí tað er ikki partur av tí lógini, har landsstýrið fekk heimild at fylgja ES, tí hetta hevur ikki beinleiðis við kríggið í Ukraina at gera. Tí mugu vit niðan í Løgtingið við nýggjari lóg fyri at fáa heimild at sanktionera hesi reiðaríini, og tann politiska viðgerðin fer í gongd beint aftan á ólavsøku. Tí at summarfrí ger, at Løgtingið kann ikki kallast saman, sigur løgmaður.
– Tað er so tað fyrsta, sum hevur skund. Síðani skulu vit taka støðu til um vit skulu gera nýggja fiskiveiðusáttmála fyri 2026, sigur løgmaður.
Trýr løgmaður uppá, at Russlandssáttmálin fer at enda?
– Tað kann henda, men soleiðis sum eg skilji støðuna, hvar fólk eru í samgonguni, so fær samgongan ikki talt upp í 17, sigur hann.
Sum skilst eru tað eini 3-4 í samgonguni, sum eru ímóti at slíta samstarvið við russar.
Tann avgerðin verður tikin, eftir at landsstýrismaðurin hevur verið til ráðførslu í uttanlandsnevndini.
