Ísraelska parlamentið, Knesset, samtykti í dag eina lóg, sum økir politiska eftirlitið við valinum av dómarum.
Lógin varð samtykt við 67 atkvøðum fyri og einari atkvøðu ímóti.
Samstundis boykottaði andstøðan atkvøðugreiðsluna í Knesset, sum tilsamans hevur 120 limir.
Lógin er liður í royndini hjá Benjamin Netanyahu, forsætisráðharra, at fremja rættarnýskipan, sum í 2023 elvdi til sera stórar mótmælisgongur í Ísrael.
Lógin fer at taka tveir limir í ísraelska advokatsamfelag úr níggju manna nevndini, sum hevur ábyrgdina av dómarasetanunum í Ísrael. Hetta skrivar Times of Israel.
Í teirra stað eru tvey politisk umboð.
Sambært ísraelskum miðlum kemur lógin ikki í gildi fyrr enn eftir næsta tjóðartingsval.
Andstøðan og túsundtals mótmælisfólk hava víst harðan atfinningar ímóti lógini, og síggja hana sum eitt stig í eini minni demokratiskari leið fyri Ísrael.
Yair Lapid, leiðari í miðhøgra flokkinum Yesh Atid, segði fáar minuttir eftir atkvøðugreiðsluna á sosiala miðlinum X, at hann hevði kært avgerðina til ísraelska hægstarætt.
/ritzau/AFP
