Tað er ikki av alstórum týdningi, at ukrainski forsetin, Volodymyr Zelensky, er við í samráðingunum um at enda kríggið í Ukraina.
Tað segði amerikanski forsetin, Donald Trump, í dag.
- Eg haldi ikki, at hann hevur stóran týdning at hava við í fundunum, segði hann í útvarpssamrøðu við Fox News, sambært AFP.
- Har hevur hann verið í trý ár. Hann ger tað sera trupult at gera avtalur, stendur víðari.
Teir báðir forsetarnir hava ikki hildið seg aftur frá at finnast at hvørjum øðrum alment í vikuni.
Mikudagin sendi Donald Trump eina ávaring til Zelensky í einum uppslagi á sínum sosiala miðli, Truth Social.
Her kallaði hann ukrainska forsetan fyri ein "einaræðisharra, sum ikki heldur val".
- Zelenskyj má skunda sær ella fer hann ikki at hava nakað land longur, skrivar Trump.
Yvirlýsingin hjá Trump kom bert fáar tímar eftir, at Zelenskyy ákærdi amerikanska forsetan fyri at liva í einum "rúmi við misinformatión", sum Russland hevur skapt.
Áðrenn ta fráboðanina hevði Donald Trump sagt, at bert fýra prosent av ukrainarum stuðla Zelenskyj, sum forsetin noktaði.
Í dag segði Trump við Fox News, at ukrainski leiðarin "hevur verið á fundi í trý ár, og einki varð gjørt."
Sama dag tosaði hann í øðrum høpi eisini um samrøður, hann hevði við ávikavist Russland og Ukraina.
- Eg havi havt sera góðar samrøður við Putin, og eg havi ikki havt so góðar samrøður við Ukraina. Teir hava eingi kort, men teir spæla tað hart.
- Men vit fara ikki at lata hetta halda fram, segði Trump á einum tiltaki, har amerikanskir guvernørar eru savnaðir í Hvítu Húsunum, skrivar AFP.
Mánadagin eru trý ár síðani Russland hersetti grannalandið.
Trump hevur fleiri ferðir sagt, at hann er sera áhugaður í at enda kríggið í Ukraina.
Harumframt hevur amerikanski forsetin áður luftað hugskotið um ein bytishandil við Ukraina, har krígsrakta landið kundi veita sjáldsom jarðevni og steinsløg til USA í staðin fyri amerikanskan stuðul.
Sambært Reuters hevur Ukraina vrakað fyrsta amerikanska uppskotið til avtalu, tí tað ikki innihelt trygd fyri landið.
Í dag upplýsti amerikanski trygdarráðgevin, Mike Waltz, at hann væntar, at Volodymyr Zelenskyj fer at skriva undir eina ráðevnissáttmála við USA.
- Her er tað týdningarmesta, at Zelensky forseti fer at skriva undir ta avtaluna, og tað síggja tit uppá heilt stutta tíð, segði hann á ráðstevnu í Washington, sambært Reuters.
/Ritzau/
